جاني جواب

انا جاني جواب من أمي
و فيه الكلمتين
كتبتلي ف يوم فرحانة
أنا جاية بعد يومين

أنا زرت بيت الله
و عملت فرض الله
و هناك أنا دعيتلك
ربنا يديك و يسلمك
و يطعمك ما يحرملك
و دعوتي تعيشلك

أنا عايزة أول ما أوصل
اشوفك و ألقيك واقفلي
و أخدك ف حضني
و أحس الشوق ف عنيك وصلي

و سلامي لكل حبايبنا
من العزيزة الغالية أمك ..

و رحت فرحان ع المينا
مستني أنا أي سفينة
وقفت مشتاق للقاها
على بيتنا علقت الزينة

عمال أفكر أقولها أية
وحشاني يا أما كتير كده ليه
ياما نفسي أشوفك قدام عيني
و أجري لحضنك و اترمي فيه

فضلت واقف مستني
و الفرحة طايرة يا ناس مني
و الوقت عمال بيعدي
و شوقي زاد غصبن عني

و بعد حبة بقيت مشغول
حسيت بجد فيه شىء مجهول
و لما رحت أسأل عنها
قالولي مركبها على وصول

لمحت ناس كده قلقانة
بيقولوا فيه سفينة غرقانة
جريت معاهم و أنا خايف
و عيوني بدموعي مليانة

الخوف بجد مسك فيا
جايبين ضحية ورا ضحية
و شفت أمي قصاد عيني
و هي طالعة م المية

وقعت من طولي ساعتها
و هما بيغمضوا عينها
كأني روحي بيخدوها
و لقيتني عمال أدعيلها

ع الجنة يا أما يا حبيبة
يا حنينة و كلك طيبة
الدنيا ضاقت ف عنيا
من بعدك انت يا أميرة

*****

اضغط هنا لتحميل الأغنية